پرینکا گاندھی نے کہا کہ آپ کی جانب سے میں مرکزی حکومت سے سوال پوچھوں گی، جن کا جواب دینا آپ کے تئیں ان کا فریضہ ہے۔ ساتھ ہی انہوں نے اس مہم کے لئے لوگوں سے تجاویز بھی طلب کی ہیں۔
نئی دہلی: کانگریس کی جنرل سکریٹری پرینکا گاندھی نے کورونا وبا کی ابتر صورت حال کے لئے ’ذمہ دار کون‘ نام سے مہم کی شروعات کی ہے۔ اس مہم کے تحت وہ عوام کی جانب سے حکومت سے سوال پوچھیں گی۔ پرینکا گاندھی نے اپنی فیس بک وال پر لکھا ہے کہ جب کورونا کی دوسری لہر نے ملک میں تباہی مچانا شروع کی، ملک کے عوام بیڈ، آکسیجن، ویکسین اور ادویات کے لئے جدوجہد کر رہے تھے، اس وقت ملک کی حکومت سے لوگوں کو کافی امیدیں تھیں لیکن حکومت پوری طرح سے خاموش تماشائی بن گئی اور ملک کو تکلیف دہ صورت حال کا سامنا کرنا پڑا۔
